ပျက်ခဲ့သမျှ ပြက်နိုင်ကြပါစေ

 ပျင်းတတ်ရင် မဖတ်တာကောင်းမယ်ခင်ဗျ။ မင်း ခြောက်ဆက် ပညာရှိကြီး စိန္တကျော်သူက “အရစ် အပင့် ရာ-မရာကို မလိမ္မာချေက အဖတ် အရွတ် အမှတ်အသား အဓိပ္ပာယ်အယူပျက်၍ မကောင်းကျိုးပင် ရောက်ရာ၏” လို့ ဆိုခဲ့သတဲ့။

မှန်နန်းရှင်လက်ထက် ရွှေကြက်ယက်သို့ သစ်ကောက်မည် ကို လွှတ်တော်မိန့်စာထုတ်တာ “ရွှေကျက်ယက်” လို့ လွှတ်တော်စာရေး သတ်ပုံမှား စာထုတ်တော့ သစ်ရှင်ပညာရှိက “ဒါ လွှတ်တော် စာမဟုတ်။ စာလုပ်ဖြစ်မယ်” ဆိုပြီး အတင်းအမာနေတယ်။ မလိုက်နာခြင်းအကြောင်းစစ်တော့ သတ်ပုံမှားတဲ့ စာရေး ရာဇဝတ်သင့်ပါရော။ ကြည့်စမ်းပါဦး။ ရစ် ရမှာ ပင့် လိုက်မိလို့။

ကျွန်တော်တို့ဆိုရင် သလုံးနဲ့ထိပ်တုံး ချွတ်ရမှာကိုမဟုတ်ဘူး။

ပြဋ္ဌာန်းစာအုပ်ကို အတည်ယူရတဲ့ ခေတ်တစ်ခေတ် ရှိခဲ့တယ်နော်။

မှန်တာ မှားတာထက် ပုံနှိပ်စာအုပ်ထဲက အတိုင်း အတည်ပဲဟေ့ လုပ်ခဲ့ကြတာ။

သိင်္ဃသူ့သမီး သင်ခန်းစာမှာ ဆုတောင်းပုံထဲ -

“ သစ္စာမရှိသော ပျက်တတ်သော” လို့ ရိုက်လိုက်တော့ မြန်မာစာဂျာနယ်တွေ၊ သင်ကြားထောက်ကူစာအုပ်တွေ၊ ပါမောက္ခရဲ့ အထက်တန်းအဆင့် စကားပြေသင်ကြားရေး စာအုပ်က အစ ပျက်တတ်သော နဲ့ပဲ ‌ရေးခဲ့ သင်ခဲ့ကြရတာ ဆယ်စုနှစ် နှစ်စုလောက် ရှိမှာပေါ့။ ကျွန်တော်တို့လည်း ကလေးတွေကို အဲဒီလမ်းညွှန်ချက်တွေအတိုင်း သင်ခဲ့ရတာပဲလေ။ သိင်္ဃသူ့သမီးက ပါဠိတစ်လုံးကို အနက်တူစကားနဲ့ ထပ်ဆင့်တာဆိုတော့ ပျက်တတ်သောရေးထိုးချက်အတွက် “ ကျင့်ဝတ်ပျက် စကားပျက် ကတိပျက် ခြင်းကို သစ္စာမရှိတဲ့အနက်နဲ့ ဆွဲကပ်ကောက်ယူ” သင်ခဲ့ကြတာပါပဲ။

မူရင်းကျောက်စာက ပ္လက်တတ်သော မပ္လက်တတ်သော (အောက်မှာ ပုံတွေ ပြထားပါတယ်)။ မြန်မာစာအဖွဲ့က စိစစ်သေချာ “ပြက်တတ်သော” လို့ ယနေ့ခေတ်သတ်ပုံနဲ့ ပြောင်းပေးပြီး လေ့လာလို့လွယ်အောင် ပြုပေးခဲ့တာ စာကိုးအဘိဓာန်က ကျွန်တော်ထုတ်ပြထားပါတယ်။

ဒီမှာ ဖော်ပြချင်တဲ့ ပ္လက် က ပြက် ပါ။ အမှန်အကန်မဆိုဘဲ ထိန်ချန်တာ။ မုသားဆိုတာ။ မဖြောင့်မှန်တာ။ လှည့်ဖျားစဥ်းလဲတာမျိုးကို ညွှန်းတာလို့ ယူဆထားကြတာပါ။ ပျက် လို ပျက်စီး တာကို ပြောချင်တာ မဟုတ်လောက်ပါဘူး။ ပြက် က ယနေ့မှာ လူပြက် ပြက်လုံး ပြက်ရယ် လောက်သာ အဖျားအနားကျန်ပြီး မူလပြောအနက်က ပေါရာဏဘက် အတော်ရောက်သွားတာကိုး။

အခု Grade 11 စနစ်သစ် အဖတ်အရွတ်မှာ ဒီကျောက်စာ သင်ကြရလို့ သစ္စာမရှိသော မဖြစ်လိုဆန္ဒနဲ့ သစ္စာရှိသော ဖြစ်လိုဆန္ဒ နေရာကလေး သင်ရင်းရောက်သွားရင် အမှားကြာ အမှန်မဖြစ်ဖို့ ငါတို့ ပြင်ကြရမယ်လို့ သတိကပ်ပြီး ပျက်ခဲ့သမျှ ပြက်နိုင်ကြရင် သိပ်ကောင်းမှာပဲဗျာ။

စေတနာဖြူဖြင့်

ကံ့ကော်ကောင်းကင် မြန်မာစာ

၀၄၀၅၂၂